Senat Tóraǵasy Qasym-Jomart Toqaev Memleket basshysy N.Á. Nazarbaevtyń bizdiń eń basty baılyǵymyz – Táýelsizdik ekenin aıtqan sózin eske saldy.
Parlament joǵarǵy Palatasynyń basshysy: «Qazaqstan Respýblıkasy Prezıdentiniń kóregen saıasatynyń arqasynda elimiz Táýelsizdik jyldary nebir syn-qaterlerden súrinbeı ótip, talaı belester men bıikterdi eńserdi. Birligi jarasqan, álem tanyǵan elge aınaldyq. Máńgilik El bolýdy baǵdar etken qýatty memleketti qalyptastyrdyq», - dep atap ótti.
Tóraǵa sózinde ekonomıkany ártaraptandyrý, turaqty ósim, halyqaralyq saıasatta dostyq pen ózara yntymaqtastyqty basshylyqqa alý, ishki saıasatta azamattyq qundylyqty joǵary qoıý damýdyń negizgi formýlasyna aınalǵany aıtyldy.
«Ekonomıkalyq damýmen qatar qoǵamda rýhanı jańǵyrýdyń qajettiligi aıqyn kórinýde. Rýhy bıik eldiń qashanda eńsesi bıik bolatyny anyq», - dedi Q.Toqaev.
Senat basshysy depýtattar men Palata Apparatynyń qyzmetkerlerin Elbasynyń keshendi baǵdarlamalaryn, el egemendigi men memleketimizdiń qarqyndy damýyn zańnamalyq turǵyda qamtamasyz etkeni úshin alǵysyn bildirdi.
Joǵarǵy Palata Tóraǵasy senatorlarǵa memlekettik jáne qoǵamdyq qyzmette sińirgen eńbegi, áleýmettik-ekonomıkalyq jáne mádenı damýyna qosqan úlesi, halyqtar arasyndaǵy dostyq jáne yntymaqtastyqty nyǵaıtqany úshin nagradalar tabys etti.
Senator Serik Bekturǵanov, Bekmyrza Elamanov, Sergeı Plotnıkov «Parasat» ordenimen; Muratbaı Joldasbaev II dárejeli «Dostyq» ordenimen; Nurlan Qylyshbaev «Qurmet» ordenimen marapattaldy.
Senator Darıǵa Nazarbaeva TMD Parlamentaralyq Assambleıasynyń sheshimimen «Sodrýjestvo» ordenimen, Rashıt Ákimov, Murat Baqtııaruly, Bekmyrza Elamanov, Dýlat Qusdáýletov, Olga Perepechına, Marat Taǵymov TMD Parlamentaralyq Assambleıasynyń «Parlamentaralyq yntymaqtastyqty nyǵaıtqany úshin» medalimen marapattaldy.
Qajyrly qyzmeti úshin depýtattar Álı Bektaev, Serik Bekturǵanov, Muratbaı Joldasbaev, Darhan Káletaev, Georgıı Kım, Nurlan Qylyshbaevqa TMD Parlamentaralyq Assambleıasynyń Qurmet gramotasy tabys etildi.
Parlament Senaty Apparatynyń birqatar qyzmetkerlerine de marapattar tabys etildi.
